Monday, February 14, 2011

കണ്ണന്‍.

ആദ്യമായി കാണാന്‍ ചെന്നപ്പോള്‍
പുത്തമ്പലത്തിലെ കണ്ണന്‍
ചുവന്നൊരു ആപ്പിളാണ്
പൂജാരിയുടെ കയ്യില്‍ക്കൂടെ
കാരുണ്യ വായ്പ്പായി എനിക്ക് തന്നത്.
അനുഗ്രഹത്തില്‍ സന്തോഷിച്ചു ഞെളിഞ്ഞു
ഞാന്‍ അന്നവിടെ മാര്‍ബിള്‍ പടികളിലെ
പ്രാവിന്‍ കാഷ്ടത്തിന് ഒപ്പമിരുന്നു
മനസ്സ് നിറച്ചു അതുണ്ടു.
പക്ഷെ പിന്നീടാണ് തെളിഞ്ഞത്
ഏദന്‍ തോട്ടത്തിലെ കനി തിന്നതിന്
ഹവ്വ കൊടുത്തതിനെക്കാള്‍ പെരുംവില
എന്റെ പറ്റിലും എഴുതിക്കഴിയപ്പെട്ടെന്ന്‍.
പിന്നീടും പൂവായും ലഡ്ഡുവായും
കല്‍ക്കണ്ടം ആയും മലരായും
പഴമായും ബൂന്തിയായും
അനുഗ്രഹങ്ങള്‍ എന്നെ തേടി വരാറുണ്ട്.
കൈക്കുടന്നയില്‍ വങ്ങുംപോഴും
കണ്ണടച്ച് വിഴുങ്ങുമ്പോഴും
ചോദ്യമൊന്നു മനസ്സില്‍ തിരിച്ചു ചോദിക്കും.
അടുത്ത പരീക്ഷ എന്ത് ,എവിടെ ,എങ്ങനെ,എപ്പോള്‍,?
 

No comments:

Post a Comment